Kòrsou, 3 di òktober 2009
Kòrsou, 3 di òktober 2009
3 - ‘Premio Notabel pa Bon Servisio 2009’
Willemstad – Konstantemente por tende ekspreshonnan di sorpresa desagradabel debí na mal servisio ku ta duna i pa kua no tin ni un konsekuensia.
Riba inisiativa di Bright Ideas & Services ta bai saka dia 17 di desèmber próksimo e promé ‘Premio Notabel pa Bon Servisio 2009’, komo un kontribushon na hasi un diferensia i rekonosé esnan ku ta motivá i konsiente pa duna bon servisio tur dia atrobe.
Tur atenshon lo ta solamente riba esnan ku ta duna bon servisio. Promoviendo bon servisio por yega na e motivashon pa otronan tambe komprondé ki impakto positivo tratamentu di hende korektamente tin den nos ekonomia i loke e ta nifiká den entrada di e empresa na unda tin bon servisio.
Kiko ta bon servisio
Bon servisio ta nifiká ku un empresa ta tuma den servisio solamente hendenan kapas i prepará i dispuesto pa duna trato korekto i servisial na esnan ku ke hasi uso di loke ku e empresa ta ofresé. E empleadonan aki ta duna klientenan un trato ku rèspèt i ku atenshon korekto, tin chèns pa klientenan ekspresá nan prekupashon i mal kontentu ku e eksperensia di servisio òf produkto ku nan tin i ta trata na akomodá esun ku ta saka su sèn pa haña algu òf un servisio. Dunamentu di bon servisio por ta na telefon, personalmente òf awendia tambe via di Internèt.
Kon partisipá
Pa partisipá mester bai riba www.kosbonso.com i pone einan bo eksperensia di bon servisio ku bo haña kaminda abo tabata kliente. E rekonosementu di bon servisio ta pa e empresa òf organisashon i no pa e empleado individual ya ku dunamentu di bon servisio ta algu di trabou den tim.
Ta publiká tur partisipashon mesora riba www.kosbonso.com di forma ku tur hende por husga realmente for di aworakí na unda tin bon servisio.
Empresanan no mester registrá pa partisipá pero tin derechi di ninga e rekomendashon na momentu ku registrá ku nan ta duna bon servisio.
Kada persona ku eksperensiá bon servisio por yena un biaha so e bon servisio ku el a eksperensiá. Hurado lo evaluá tur partisipashon regularmente i dia 17 di desèmber 2009 ta saka e ganadó ku lo bira ehèmpel di kon mester duna bon servisio.
E ganadó un aña largu ta keda profilá grátis riba tres wèpsait, e ta bai haña menshon regular den programanan na radio i na televishon i tin un rekonosementu tambe inkluí den su premio. Tur esaki komo promoshon pa e echo ku su empresa òf organisashon ta mihó den dunamentu di servisio i komo tal tambe ehèmpel di kon mester duna bon servisio.
Tin un hurado final ku ta bai evaluá e rekonosementunan di bon servisio for di kua ta bai saka e ganadó definitivo. E hurado ta konsistí e.o. di Irene van Grieken, Gabriël ‘Boy’ Magdalena, Maria Diwan i Jason Rafaël.
Banda di e hurado final tin tambe diferente persona ku ta bai hasi uso inkognito di diferente servisio pa por haña mas ehèmpel posibel di kon por duna bon servisio.
Riba www.kosbonso.com i www.notabel.com tin tur informashon di e promé ’Premio Notabel pa Bon Servisio 2009’.
Un petishon ta bai na tur empresa ku sa balor di bon servisio pa nan motivá nan empleadonan pa nan partisipá konsientemente dunando bon servisio pa nan empresa por kalifiká pa bira ganadó di e promé ‘Premio Notabel pa Bon Servisio 2009’. Den mes rosea ta spera tambe di tur konsumidó ku nan ta registrá e bon servisio ku nan a haña pa asina ei duna balor na e empleado ku tabata sa pakiko mester duna bon servisio.
Pa mas informashon riba e promé ‘Premio Notabel pa Bon Servisio 2009’ por tuma kontakto na info@notabel.com.
Kòrsou, 9 di yüli 2009
2- Mas ku shen kos bon so di Kòrsou registrá.
Willemstad – Ya tin mas ku shen kos bon so di Kòrsou registrá riba www.kosbonso.com. E Tim di KOSBONSO.COM ta agradablemente sorprendí ku e kantidat di hendenan ku a disidí na registrá riba e sitio sosteniendo asina un movementu konsiente ku ta dokumentá kos bon so di Kòrsou.
No ta asina ku no ta mira kosnan ku por bai mas mihó pero ta visibel ku tin asina tantu kos bon so na Kòrsou ku ta tur hende ke bin biba aki i nos tur mester hasi uso di e kosnan bon so ku Kòrsou tin di ofresé.
Meta di promé etapa di e proyekto di kos bon so ta pa yega mas lihé posibel na mil kos bon so riba kosbonso.com. Despues ta kontinuá ku un otro proyekto pa asina ei kontinuá na amplia e dokumentashon di kosnan bon di Kòrsou.
Den e mas ku shen kosnan bon so di Kòrsou registrá kaba tin e.o.:
Gratitut di ta yu di Kòrsou, elogio pa naturalesa i arkitektura di Kòrsou, éksito di e tim kulinario di Kòrsou ku a hasi resientemente un hopi bon impreshon na e evento “ Taste of The Caribbean Culinary Competition na Puerto Rico, atenshon ku deporte pa mucha ta haña, harimentu di e hende muhé outéntiko yu di Kòrsou, ku Kòrsou ta un di e paisnan mas seif na mundu pa turista, e echo ku nos ta un komunidat multikultural, nos bandera, bunitesa di Kòrsou, kon moderno i digital nos ta, balor pa historia di Kòrsou, elegansia di hende muhé yu di Kòrsou i e echo ku Kòrsou ta nos kas.
Banda di djis skibi kiko ta eksperensiá komo kos bon di Kòrsou tin tambe oportunidat pa bira miembro di e movementu ku ta desaroyando di kos bon so di Kòrsou i partisipá na eventonan spesífiko. E reakshonnan di e kantidat di hende ku ya a bira miembro di e movementu di kosbonso di Kòrsou ta indiká kaba ku tin rason pa move tur kos bon di Kòrsou.
E TIM DI KOSBONSO .COM ta invitá tur hende ku sa un kos bon di Kòrsou pa nan (sigui) registrá riba www.kosbonso.com.
Por komuniká ku e Tim di KOSBONSO.COM na info@kosbonso.com.
Kòrsou, 14 di yüni 2009
1 - Ban pa mas ku 1000 kos bon so di Kòrsou
Willemstad - E fin di siman tras di lomba a lansa ofisialmente e website www.kosbonso.com ku e intenshon pa den un tempu kòrtiku kolekshoná riba un página mas ku mil kos bon di Kòrsou.
E idea a lanta despues ku a keda ekspresá diferente prekupashon pa e echo ku tin muchu kos negativo ta keda papiá di i riba Kòrsou, loke sigur no ta benefisiá un ambiente i sintimentu di patriotismo na Kòrsou.
Ku www.kosbonso.com por akumulá pensamentu, opinion i sintimentunan konstruktivo ku ta biba na Kòrsou tokante di Kòrsou basá riba eksperensia di esnan ku ke Kòrsou bon i ku sa mihó.
E petishon ta pa tur hende ku ta kere den e bon ku Kòrsou ta pa su yunan i pa tur estranhero ku a bin keda aki, bai riba promé página di www.kosbonso.com i einan ekspresá libramente den mesun tantu palabra ku bo ke, kos bon so di Kòrsou. Mas nos mes sa di kon bon Kòrsou ta mas nos por kòrda i konvensé otro hende.
Despues ku logra mas ku mil kosbonso di Kòrsou ta bai sigui ku otro meta pa asina ei kontinuá na duna un kontribushon na e sintimentu di patriotismo na Kòrsou.
E Tim di KOSBONSO.COM ta spera ku tur ku ke duna un man pa sostené e bon imágen di Kòrsou lo manda nan opinion na info@kosbonso.com pa asina ei laga sa kon nan ke kontribuí ku e proyekto optimista aki.
Kontribuí i pone abo tambe loke bo ta haña bon, tremendo, fantástiko i normal di Kòrsou i asina ei sigui proklamá na tur hende, kon bon Kòrsou ta.
Por komuniká ku e Tim di KOSBONSO.COM na info@kosbonso.com.
